Fitaccen jarumin Kannywood, Adam Abdullahi Zango, wanda aka fi sani da Prince Zango, ya ƙara ɗaura aure da wata jaruma daga cikin masana’antar shirya fina-finan Hausa, Kannywood. Wannan sabuwar amaryarsa ita ce Munat, jaruma da ta fito a cikin shirin Garwashi, wanda aka sha kallo a gidajen mutane da dama.Labarin auren ya iso garemu ta bakin wasu daga cikin na kusa da jarumin, ciki har da daraktoci da masu shirya fina-finai.
Sun tabbatar da cewa an gudanar da ɗaurin auren cikin tsari da natsuwa, tare da halartar ‘yan uwa da abokan arziki na kusa da ma’auratan.
Adam A. Zango wanda aka sani da gwanin wakar soyayya da shahararren jarumi a fina-finan Hausa, yana daga cikin manyan fitattun jarumai da suka shahara fiye da shekaru goma a Kannywood.
A ɓangare guda kuma, Munat na daga cikin sabbin jarumai da ke ƙara samun karɓuwa a idon masu kallo ta hanyar rawar da take takawa a shirye-shiryen fina-finai.
A cewar wasu daga cikin abokan aikinsu, wannan aure ba wai kawai haɗuwa ce ta soyayya ba, har ma yana nuna yadda masana’antar Kannywood ke ci gaba da samar da kyakkyawan dangantaka tsakanin ‘yan fim.Yanzu haka, masoya da mabiyan Adam A. Zango da Munat suna ta tura saƙonnin taya murna a shafukan sada zumunta, suna masu fatan Allah Ya sanya albarka a zaman aurensu, Ya ba su zuri’a ta gari da kwanciyar hankali.
Karin bayani yana tafe daga bakin jarumin da kansa da kuma ‘yan fim da suka halarci taron.
